Krackadile in Guyana gyardins

Meh see 2 bai ketch wan krakadile or wan kaiman in d gyradins today. Meh see d thing lang now...meh see wan anakunda to. meh aks dem wah dem a guh do wid am but dem nah ansa. dem muzzy guh guh sell am

Gyardin Moselee fo pressy?

Aye, ayo hare dah bai wah duz deh pan kyapital news want tun sum

presssy? Yes, Gyardin Moselee. E duzz prapa mek up e self pan TV nah?

D bai no how fo do e wuk. e duz prapa mek meh laff. 

Yes man, dah same bai wah Barat nah want guh in affice ah d president.

D bai nah want tell Bara sahree yet. but Barat duz talk up wid e nice enny

way else. 

So, e want tun president ah dem mede-ya people, dem people wah duz write newspapa

and dem wan wah duz den pan tv. 

Suh wah ayo think?

 

Pragress? in fi-tin domestik vilence?

homan ah get beat up, chap up, and dem a get murdah and d Minista Manickchand seh how

dem ah mek pragress in fi-tin domestik vilence!

sum thing nah wrang deh?

meh start wan nada blag

suh meh gah fine thing fo do when meh gat lil time. meh guh try fo put an hay news an suh like how me an you duz tahk when abhay deh parika backdam, winsah farist or rose hahl. meh hexpain pan d blag dat creole lang-wage nah mean abhay backwurd or abhay fram kuntryside. meh guh post uzin "fuhnetiks." dah mean seh how meh guh write how d word dem ah pronouks. meh hope hayo handahstan...wait fo d posts...meh gafo guh write wan sennah pad story...